Kryeministri Berisha reagoi sot për vrasjen e kryeterroristit dhe liderit të Al Kaedës, Osama Bin Laden, duke e cilësuar atë si një fitore të madhe të Shteteve të Bashkuara të Amerikës ndaj terrorizimit.
Në një prononcim për mediat, kryeministri Berisha u shpreh se Bin Laden mori atë që meritonte, ndërsa ka theksuar se ky lajm është një lehtësim për familjarët e mijëra viktimave të 11 shtatorit.
Më gjërësisht kryeministri tha :
“Kryelajmi i botës sot është eliminimi i njërës prej figurave më të zeza të historisë së njerëzimit. Njeriut që me primitivizmin e tij, me agresivitetin e tij mori mijëra e mijëra jetë në Nju Jork, por dhe në shumë vende të tjera, jetë të pafajshme,të burrave, grave e fëmijëve, në të cilat ky njëri mizor, Bin Laden, donte të realizonte qëllimet më mesjetare, qëllimet më çnjerëzore.
Këto ditë në strofkullën e tij ai mori atë përgjigje që meritonte prej vitesh. Kjo është një fitore e madhe e Shteteve të Bashkuara të Amerikës , presidentit Barak Obama, është një fitore e madhe e paqes dhe të gjithë atyre që e konsiderojnë terrorizmin si armik numër një të paqes dhe lirisë së tyre.
Ky është lajmi më ngushëllues për familjarët e mijëra e mijërave viktimave të pafajshme, të sulmeve që kryeterroristi Bin Laden organizoi në shumë vende të botës” .
Post a Comment